_20251209_071942_0000.png)
# ليه الجري في الشتا ممتع ومفيد؟
- الجو البارد بيخلي الأداء أحسن: الجسم مش بيستهلك طاقة كبيرة علشان يبرد نفسه زي الصيف، فبتقدر تجري مسافات أطول وتحافظ على سرعة كويسة.
- حرق سعرات أعلى: في الجو البارد الجسم بيحاول يحافظ على حرارته، وده بيزود معدل الحرق وقت الجري.
- المود بيتحسن: شمس الشتا بالرغم من إنها بتبقى قليلة مع الجري في الهوا بيخلي الواحد يفرز هرمونات السعادة ويكسر أي إحساس بالكسل أو الاكتئاب الشتوي.
- تقوية المناعة: النشاط البدني المنتظم في الشتا بيساعد الجسم يقاوم نزلات البرد والإنفلونزا.
# إمتى تكمل وتستمتع بالجري؟
- لما الجو يكون بارد بس مش شديد البرودة: يعني درجة الحرارة معقولة.
- لما تكون لابس لبس مناسب: تيشيرت حراري أو جاكيت خفيف، مع جوانتي أو كاب لو الجو فيه هوا جامد.
- لما تحس إن جسمك متسخن كويس بعد الإحماء: دا ح يخلي الجري آمن وممتع.
- لما الطريق يكون آمن ومفيهوش مطر جامد أو أرض مزحلقة: علشان تتجنب الإصابات.
# إمتى لازم توقف وتلغي الجري؟
- لو الجو شديد البرودة أو فيه عواصف: الجري في ظروف قاسية ممكن يسبب مشاكل في التنفس أو نزلات برد قوية.
- لو فيه مطر شديد أو الأرض مبلولة: خطر الزحلقة بيزيد، وده ممكن يعمل إصابات في الركبة أو الكاحل.
- لو جسمك مش جاهز: لو حاسس بإرهاق،أو برد، أو أي أعراض مرضية، الأفضل ترتاح وتأجل الجري.
- لو فيه شبورة تقيلة: الرؤية بتكون ضعيفة، وده خطر خصوصاً لو بتجري في طرق فيها عربيات.
# نصايح عملية للجري في الشتا
- اعمل إحماء كويس قبل ما تبدأ، علشان العضلات تبقى جاهزة.
- البس طبقات خفيفة تقدر تقللها لو حسيت بالحرارة وقت الجري.
- اشرب ميه حتى لو مش عطشان، لأن الجسم بيحتاج ترويه في البرد زي الحر.
- اختار وقت مناسب: مش لازم تبدأ في الفجر زي الصيف، من الصبح بعد شروق الشمس لقبل المغرب بيكون الجو أنسب في الشتا بحيث درجة الحرارة تكون أحسن.
- لو الجو مش مساعد، ممكن تعوض بجري في مكان مغلق على مشاية أو تمارين بديلة.
الجري في الشتا فرصة عظيمة تستمتع بالجو المنعش وتستفيد من فوايده الصحية والنفسية. بس لازم تكون واعي وتفرق بين الظروف اللي تشجعك تكمل، والظروف اللي لازم تقول فيها "كفاية النهاردة". سلامتك أهم من أي تمرين، والجري دايماً موجود، لكن صحتك لو اتأثرت ح تخسر أكتر.
